महाराष्ट्रातील नागरिकांसाठी आणि विशेषतः शेतकऱ्यांसाठी मोठा दिलासा देणारा निर्णय महसूल विभागाने घेतला आहे. राज्यात आता डिजिटल 7/12, 8-A आणि फेरफार उतारे पूर्णपणे कायदेशीर करण्यात आले आहेत. महसूल मंत्री चंद्रशेखर बावनकुळे यांच्या आदेशानंतर या निर्णयाचे राज्यभर स्वागत होत आहे.
या नव्या प्रणालीमुळे आता नागरिकांना तलाठी कार्यालयात वारंवार चकरा मारण्याची गरज राहणार नाही. तसेच उताऱ्यावर स्वाक्षरी किंवा शिक्क्याचा त्रासही होणार नाही. नागरिकांना फक्त 15 रुपये शुल्क भरून अधिकृत डिजिटल 7/12 उतारा महाभूमीच्या अधिकृत पोर्टलवरून सहज मिळणार आहे.
डिजिटल उतारा मिळवण्यासाठी नागरिकांना digitalsatbara.mahabhumi.gov.in या वेबसाइटवर जाऊन ऑनलाइन पेमेंट करावे लागेल. पेमेंट पूर्ण झाल्यानंतर काही सेकंदांतच डिजिटल 7/12 उतारा डाउनलोड करता येतो.
या डिजिटल उताऱ्यावर डिजिटल स्वाक्षरी, QR कोड आणि 16 अंकी पडताळणी क्रमांक दिलेला असतो. त्यामुळे हा उतारा पूर्णपणे वैध असून तो सरकारी कार्यालये, निमसरकारी संस्था, बँका आणि न्यायालयांमध्येही स्वीकारला जाणार आहे.
संगणकीकृत आणि डेटाबेस-आधारित या नव्या प्रणालीमुळे महसूल विभागाच्या कामकाजात पारदर्शकता आणि वेग येणार आहे. ग्रामीण आणि शहरी नागरिकांना जमीनसंबंधित कागदपत्रे मिळवणे आता अधिक सोपे होणार आहे.
यापूर्वी अनेक वर्षे शेतकऱ्यांना 7/12 उताऱ्यासाठी तलाठी कार्यालयात वारंवार जावे लागत होते आणि कागदपत्रांची प्रक्रिया वेळखाऊ ठरत होती. मात्र आता या डिजिटल क्रांतीमुळे त्या सर्व अडचणींना पूर्णविराम मिळणार असून नागरिकांचे काम काही मिनिटांत पूर्ण होणार आहे.
महसूल मंत्र्यांनी गेल्या वर्षभरात विभागातील अनेक प्रलंबित प्रश्न सोडवण्यावर भर दिला आहे. डिजिटल 7/12 प्रणाली हा त्याच प्रयत्नांचा महत्त्वाचा टप्पा मानला जात आहे, ज्यामुळे राज्यातील लाखो शेतकऱ्यांना मोठा दिलासा मिळणार आहे.
