नाशिकमध्ये घडलेल्या आयटी कंपनीतील कथित धर्मांतर आणि लैंगिक शोषण प्रकरणामुळे राज्यभरात खळबळ उडाली असून या प्रकरणावर आता राजकीय पातळीवरही तीव्र प्रतिक्रिया उमटू लागल्या आहेत. भाजप युवा मोर्चाचे प्रदेशाध्यक्ष कृष्णराज महाडिक यांनी या प्रकरणात थेट मुख्यमंत्री देवेंद्र फडणवीस यांना पत्र लिहून कठोर कारवाईची मागणी केली आहे.
नाशिकमधील मुंबई नाका पोलीस ठाण्याच्या हद्दीत एका मल्टिनॅशनल आयटी कंपनीत काम करणाऱ्या महिलांवर लैंगिक अत्याचार, आर्थिक छळ आणि जबरदस्तीने धर्मांतर करण्यासाठी दबाव टाकल्याचे गंभीर आरोप समोर आले आहेत. या प्रकरणात आतापर्यंत अनेक गुन्हे दाखल झाले असून काही संशयितांना अटक करण्यात आली आहे.
नेमकं प्रकरण काय?
तपासातून समोर आलेल्या माहितीनुसार, कंपनीतील काही अधिकारी आणि कर्मचारी संगनमताने आर्थिकदृष्ट्या दुर्बल पार्श्वभूमीतील महिला आणि तरुणींना लक्ष्य करत होते. त्यांना वेगवेगळ्या ठिकाणी नेऊन लैंगिक शोषण, मानसिक छळ आणि धर्मांतरासाठी दबाव टाकल्याचे तक्रारीत नमूद आहे. एका पीडित महिलेने धाडसाने तक्रार केल्यानंतर हा संपूर्ण प्रकार उघडकीस आला आणि त्यानंतर आणखी तक्रारी समोर आल्या.
या प्रकरणामुळे आयटी क्षेत्रातील महिला सुरक्षेचा मुद्दा पुन्हा ऐरणीवर आला आहे. विशेषतः कॉर्पोरेट कंपन्यांमध्ये अंतर्गत सुरक्षा यंत्रणा किती प्रभावी आहे, यावर प्रश्नचिन्ह निर्माण झाले आहे.
कृष्णराज महाडिक यांची भूमिका
कृष्णराज महाडिक यांनी या प्रकरणात आक्रमक भूमिका घेत मुख्यमंत्री देवेंद्र फडणवीस यांना पत्र पाठवले आहे. या पत्रात त्यांनी सखोल चौकशी करून दोषींवर कठोर फौजदारी कारवाई करण्याची मागणी केली आहे. तसेच कंपन्यांमध्ये महिला सुरक्षेसाठी मजबूत अंतर्गत यंत्रणा उभी करणे, कर्मचाऱ्यांची चारित्र्य पडताळणी करणे आणि धर्मांतरासारख्या गंभीर बाबींवर कठोर नियंत्रण ठेवण्याची गरज त्यांनी व्यक्त केली आहे.
महाडिक यांनी एका व्हिडिओद्वारेही प्रतिक्रिया देताना सांगितले की, “महिलांना सुरक्षित वातावरण मिळणे अत्यंत गरजेचे आहे. अशा घटना पुन्हा घडू नयेत यासाठी सरकारने तातडीने पावले उचलली पाहिजेत.”
आंदोलनाची चेतावणी
या प्रकरणावर भाजप युवा मोर्चानेही आक्रमक भूमिका घेत संबंधित कंपनीविरोधात आंदोलन छेडले आहे. दोषींवर कठोर कारवाई न झाल्यास आंदोलन अधिक तीव्र करण्याचा इशाराही देण्यात आला आहे.
महाडिक यांनी कंपन्यांना देखील इशारा देत सांगितले की, व्यवस्थापनातील अशा गैरप्रकारात सहभागी असलेल्या व्यक्तींना तात्काळ कामावरून काढून टाकले पाहिजे. तसेच त्यांनी महिलांना आवाहन केले की, कुठेही असुरक्षित वाटल्यास त्यांनी त्वरित आवाज उठवावा.
पुढील कारवाईकडे लक्ष
सध्या या प्रकरणाचा तपास सुरू असून आणखी काही धक्कादायक माहिती समोर येण्याची शक्यता व्यक्त केली जात आहे. पोलिसांकडून तपास वेगाने सुरू असून आरोपींवर कठोर कारवाई होण्याची अपेक्षा व्यक्त केली जात आहे.
दरम्यान, या घटनेमुळे राज्यात महिला सुरक्षेचा मुद्दा पुन्हा चर्चेत आला असून सरकारकडून यावर ठोस उपाययोजना केल्या जातील का, याकडे सर्वांचे लक्ष लागले आहे.
